تأمين حسابات موقع التواصل الاجتماعي فيسبوك

السلام عليكم

يا رب جميعا تكونوا بخير و في احسن حال

حابه اكلمكوا عن حاجه مهمه اوي و هي سرقة حسابات الفيس بوك في الفتره الاخيره..

أولا : 

تجنبا لأننا نقع في فخ من الهاكرز 

مفيش أي موقع في الدنيا عشان نشترك فيه هنحتاج ندخل باسورد الميل أو الفيس ...

اه في مواقع بتشترط نشترك بالميل أو الفيس .. لكن بنستخدم باسورد جديدة خاصه بحسابنا علي الموقع ..

ثانيا :

عشان لو بظروفها وقعنا في أي فخ من أي هاكر .. يفضل نكون مأمنين حساباتنا بطريقتين للدخول ...

بمعني نخلي الباسورد لوحدها مش كفايه .. 

هوريكوا حالا بالصور ازاي 

اول حاجه بندوس علي العلامه اللي كأنها ٣ شرط تحت بعض و ننزل نختار setting and privacy

زي الصوره كدا

هيتفتح بعدها اختيارات اكتر ... نختار منها setting

و بعد كدا نختار security and login

في الاختيار ده هنلاقي حاجات كتير 

زي مثلا الاجهزه اللي عملنا منها تسجيل دخول ... و المكان اللي بتغير منه الباص ورد 

لكن اللي عايزين نتكلم عنه هو

Use 2 Factor authentication

و دي معناها أن تسجيل الدخول بيكون بالباسورد و حاجه كمان معاها

و انا بفضل أن الحاجه التانيه تكون رساله علي الموبايل
اول حاجه بتقوله هنبدأ نفعل الطريقه دي
فبنختار Get started

و بعد كدا بنختار الطريقه الاضافيه و انا هنا اختارت رساله نصيه علي الموبايل

لو احنا مدخلين رقم موبايل علي الاكاونت بيجيلنا رساله بكود .. بمكتبه و بتتفعل الطريقه

و لو مكناش رابطين الحساب بموبايل هندخل رقم الموبايل و بردوا هيجيلنا كود ندخله هنا كدا

و ندوس next
و بكدا نكون فعلنا الحمايه

نسجل خروج من كل الاجهزه و نمسح الاجهزه اللي متسجله

و بكدا نقدر نستخدم الفيس بأمان اكتر


دمتم بخير

حكاية حادثة - تفريغ طاقة سلبية

السلام عليكم و رحمة الله و بركاته

التدوينة دي ملهاش أى 60 لازمة  لأي حد
ما هى إلا طريقة لتفريغ طاقتي السلبية
لو أنت سيء الحظ هيقع عينك علي التدوينة
و لو انت وصلت للكلمة دى انصحك كفاية قراءة

النهاردة 13 مارس 2017
لسه اليوم بيبدأ ... لسه الفجر مأذنش
و مع ذلك كأنه اليوم العالمي للذكريات السيئة

أي حاجة ضايقتنى في حياتى جايه في بالي
حتى الحاجة الحلوة اللي منتظراها ... جت في بالي بشكل مشوه
حتى مصدر سعادتى (( المفاجآت)) التفكير فيها وصلنى للبكاء
حتى فرحى اللي قرب افتكرت ((وسام)) جارتي و قطتى :(
اللي كان فرحها بردوا قرب لكن اتوفت في حادث أليم

و أخيرا و ليس آخرا جانى سؤال
مش قادرة اوصفه غير انه حقير
علي ابلكيشن اسك

ده السؤال برنت اسكرين
جاوبته بمجرد ما شوفته
بس كنت متنرفزة
فالاجابة مخدتش حقها و قررت أجاوب بجد

زى ما شوفتوا
((انتى يا امينة باين اوي انك عايشة حياتك ليه عاملة فيها زعلانة علي اصحابك اللي توفو الله يرحمهم طبعا بس ليه عاملة زعلانة و انتي لسه عايشة حياتك دا حتي مغيرتيش صورة البروفايل))

أولا : بالنسبة لحياتى اللي أنا عيشاها :
هل حياة حد بتوقف لموت حد ؟!!!
أبدا و الله ... الحياة بتفضل ماشية

ثانيا : ليه عاملة زعلانة ؟؟؟
سوري يعنى ... و انا هعمل زعلانة ليه
من حيث زعلانة فأنا فعلا زعلانة
بس فعلا من المرات القليلة جدااا اللي بكتم زعلي
و معملتش أى مظاهر حزن أو حداد
حتى التعبير العادى عن الحزن معملتهوش
حتى شغلي منقطعتش عنه
باختصار لازلت عايشة حياتى
باكل و بشرب و بخرج و بعمل شوبينج و بحب و بفرح و بزعل
زى أى حد عادى
أيه جريمتي يعني ؟!!!!

ثالثا : أيه كمية التناقض دى ؟!!!!
منين عايشه حياتى ، و منين عاملة زعلانة

رابعا : مغيرتش صورة البروفايل
فعلا انا من الناس اللي مش بغير صورة البروفايل الا اما يستهوينى شيء للتغيير
لا فرح و لا حزن بيكون سبب التغيير الأساسي
علي ما اتذكر ... مغيرتش صورة بروفايلي وقت ما اتخطبت الا بعدها ب 4 او 5 أيام
فده العادى بتاعي

 ______________________________________________

اللي فعلا عايزه اتكلم عنه و مش كتير يعرفه

يوم 4 مارس 2017  يوم الجمعية العمومية لمهندسي مصر هو نفسه يوم الحادث الذي توفت علي أثره الأختان ريهام و وسام.

علاقتى بريهام أكتر من سطحية ... هى جارتى ... بحكم الجيرة بيننا سلام ..

لكن الأمر مختلف بعض الشيء مع وسام ... باعتبرها صديقتتى اللي مش بنتكلم الا في الطوارئ
و ساعات بنتكلم بظروفها ...
من الناس الطيبة أووووي ...
أحسبها علي خير و الله حسيبها و لا ازكي علي الله احدا
و كنا ساعات بنتناقش في تجهيزات الزواج خصوصا اننا بنمر بنفس  التجربة

المهم ... اليوم ده كنت راجعة بعد يوم لذيذ مع اصحابي في الجمعية العمومية
اما عرفت بالحادث
جه في دماغي ذكري بطريقة غريبة
و هى الحادث اللي اتعرضت له انا و م. هبة هاشم  و ميدو مصر في 7-2014
و خرجنا أحياء نرزق من العربية دى




مع العلم ان الصورة دى اتصورت بعد ما العربية قعدت يومين بيتعمل لها سمكرة :)

 كان ممكن نبقي في عداد الموتي ... بس ربنا مش مقدر لنا ده

بس نفسيا الصدمة كانت كبيرة ... من وفاة ريهام ... يليها بساعة تقريبا وسام ((من جهة))
و ((من جهة اخري)) والدتهم اللي كانت في حالة خطر في المستشفي أثر نفس الحادث
و ((من جهة مختلفة)) اختهم الصغري اللي حالتها يرثي لها بين ألم الفقد و القلق علي والدتها
و ((من جهة أخيرة)) الذكري اللي مرت في دماغي
فيما يخص بالحادث اللي سبق و اتعرضت له و طريقة معالجتى للموضوع ككل

_________________________________

تانى يوم كانت بعد صلاة الظهر كانت صلاة الجنازة
صلينا و شوفت آلاء :(  اللي كانت بايته جمب والدتها في المستشفي
و معندهاش فكرة مسبقة باللي حصل لاخواتها

بدون تفاصيل أكتر

كل الموقف مؤلم و مرعب

__________________________________

و مع كل ذلك

اخدت قرار يقينى علي العشاء يومها

أن الحياة مش هتقف ... و فعلا هكمل حياتى طبيعية

علي عكس المتوقع نزلت الشغل

و كملت الحياة عاااااادى جداااااااااااااا

مش لأن شيئا لم يكن ... لأ ... لكن لأن الحياة مبتقفش

__________________________________

النهاردة معدل طاقتى السلبية 200%
لأسباب كتير لا داعي لذكرها

بقلب في البروفايل بتاعى
شوفت التعازى اللي مرديتش عليها عشان فعلا مكنتش مؤهلة للرد وقتها

رديت و شكرت الناس

بس تقريبا الشكر ده اثار حفيظة حد عشان يسأل سؤال بايخ
فاضطر اكون أكثر بواخة في الرد و اضطر بعدها انى اصدعكم بالتدوينة دى

ع العموم زى ما قلت التدوينة دى ملهاش اى لازمة
و لو انت لسه بتقرأ
شكرا لانك قرأت لي كلام ملوش لازمة
و شكرا علي وقتك

و بما انك مكمل خد ثواب و أدعي لوسام و ريهام بالرحمة و المغفرة
و لوالدتهما بالشفاء العاجل
و لاختهم الاء بالصبر و السلوان

حل لغز باي بال Pay Pal في مصر

السؤال اللي كتير بيتسأل
و الاجابات بتكون محدودة و غير واضحة
قررت اجاوب عليه رد مفصل من واقع تجربتي الشخصية و محاولاتى المختلفة ...

أولا : ما هو باي بال Pay Pal ؟؟ 
باي بال هو بنك إلكتروني افتراضي بتقدر من خلاله تدفع و تستقبل فلوس بعد ربطه بوسيلة ملموسة في بلدك سواء حساب بنكي أو بطاقة ذكية .

ثانيا : هل باي بالPay Pal  بيعمل withdrawl في مصر بمعني هل بيقبل السحب ؟؟
 نعم , تقدر تستلم فلوسك الموجودة علي باي بال Pay Pal في مصر ... لكن بتستلمه بمعا يعادلهم بالجنيه المصري.

ثالثا: هل في رسوم مقابل ذلك ؟؟
نعم , رسوم تحويل من الباي بال Pay pal مقدارها 5 دولار عن كل عملية (لأن التحويل الاتوماتيكي المجاني معطل في مصر حاليا ) و ممكن لو عندك نفس طويل تحاول تتواصل مع الدعم الفني يمكن يعملوا لك اعادة رسوم , بس ده مش دايما بيحصل .
و البنك بياخد عمولة سحب نقدي مقدارها 1.5% 

رابعا :  كيف انشيء حساب باي بال Pay Pal   ؟؟
 سهل جدااا , نفس الطريقة للتسجيل علي أى موقع , مع مراعاة الدقة في كتابة البيانات , و منتهى الدقة في اختيار بريد الكتروني تستخدمه بصورة دورية , و اختار باسورد مناسبة .

خامسا: كيف أفعل باي بال Pay Pal   و اربطه ببطاقة ؟؟

الاجابة شقين  :

الشق الأول 
لو كان تفعيل للدفع , فأى بطاقة مفعلة للاستخدام علي الانترنت , و بها ما يعادل 1.55 يورو تصلح للتفعيل أيا كان نوعها ( ماستر كارد أو فيزا - ديبت أو كريدت أو بري بايد ) ... مش هتفرق و هتفعل الحساب بدون مشاكل ((لكن تفعيل للدفع فقط (( و لن تتمكن من استلام اموال , بس هتقدر تشتري و تحاسب فيس بوك براحتك.

الشق الثاني
 لو كان تفعيل للسحب (( و ده اللي أغلب الفري لانسر محتاجينه لسحب أرباحهم )) , لازم لازم لازم الكارت يكون فيزا ((ماستر كارد لا يصلح)) , و شرط أساسي يكون به ما يعادل 1.5 يورو.

انا جربت السحب بنجاح باستخدام  فيزا كلاسيك  من البنك الأهلي المصري ....

يتم استلام الارباح بالجنيه المصري و ليس بالدولار حسب قيمة الدولار مقابل الجنيه في البنك الصادر للبطاقة المستخدمة , في اليوم الذي يتم فيه التحويل ...

سادسا : ما هى شروط استخراج فيزا كريدت البنك الأهلي؟

شروطها مثل أى حساب ائتمان ضمان مادى و الضمان ده بيكون شقين

إما : ضمان تحويل راتب علي البنك .

أو : وعاء إدخاري بقيمة 5 آلاف جنيه أو أكثر .

لو مش حابب تعمل كل ده و حابب استلم لك ارباحك و احولهم لك بعض خصم مقابل مادي بالاضافة إلي الرسوم يمكنك التواصل معي ...

و لو في أى استفسار ...
راسلني أو اكتب تعليق و هرد علي كل التعليقات بإذن الله

بيع و شراء

كل حاجه ف الدنيا بقيت بيع و شراء

حتي العلاقات الانسانية

حتي تعامل البشر ببعض

سواء علاقات شخصية أو علاقات عمل أو حتى علاقة عاطفية

كلللللللل حاجه بين البشر أصبحت بيع و شراء

أمينة ... أنتي بتخرفي ؟؟

 الناس و علاقاتهم و الحب و العشرة و الشغل كله بيع و شرا ؟؟؟

أيووووووووون بيع و شرا

و أنا مش بخرف

و هقول أمثلة عشان أوضح

أي علاقة في الدنيا بتبدأ بعملية بيع

حتتتتتتتتتتتتتتتي الحب

الحب في حد ذاته أقوي عملية بيع بتحصل

اللي بيحب (الطرف الأول) بيبيع للطرف الآخر فكرة مبسطة عن شخصيته

و العميل (الطرف الآخر)

 يا يشتري علاقته بالشخص ده

و يقبل الصفقه مبدأيا

يا يرفضها

بمجرد القبول المبدأي للصفقه بتتوالي عمليات البيع و الشرا

كل طرف بيبع للطرف الآخر مجموعة أفكار

 عن نفسه و شخصيته و أسرته و إلخ إلخ

و الاخر بالتلقائي بيشتري

و أحيانا بيوصل الطرفين لنقطة صدام أو عملية بيع عليها خلاف

و بيدأ الطرف المعترض في محاولة التفاوض

 مع الطرف صاحب الموضوع اللي عليه الخلاف

و بيحاول بكل جهده يقنعه انه يستبعد عملية البيع دى من الصفقة

 أو ع الأقل يقلل من شروطه ف الموضوع ده

زي بالظبط الفصال ف البيع و الشرا

و هكذا لحد ما تتم الصفقة ... قصدي مشروع الزواج

مثال أبسط

التعارف بين أى شخصين عملية بيع و شرا بسيطة

الشخص الأول بيبع فكرة للشخص التانى عن نفسه و شخصيته

و بناءا عليه بيقرر الشخص الثانى يشتري صداقة و معرفة الشخص الأول و لا لأ

مثال مختلف

في ناس بتعتقد أنى طموحة و مفكرة و متواضعه و إلخ إلخ

ليييييييييييييه

لانى انا سوقت نفسي امامهم بالشكل ده

و هما اشتروا الفكرة دى منى

و علي النقيض

في ناس بتعتقد انى مغرورة و تنكة و الخ الخ

ليييييييييييييه

لانى بردوا سوقت نفسي امامهم بالشكل ده

و هما اشتروا الفكرة دى منى

ليه كاتبه الكلام ده

؟؟؟؟؟؟؟؟؟؟؟؟؟؟؟؟؟؟؟؟؟

و أيه الفكرة اللي ببيعها لكوا في التدوينة دي

الفكرة ببساطة

لو عايز تكون ناجح في كل حياتك اتعلم أصول البيع و الشراء

و احترف فنون التفاوض

لأنك لو عملت كده ... فمبارك عليك تحقيق أغلب طموحاتك مقدما

بكره أحلي بإذن الله

** بكره جاي علي فكره 

_ كلااااااااااااااااااااااام

** راح تخسر أيه لو تسمعه .... وتصدقه ؟؟؟ 

_ هيفيد بأيه سمعان كلام عيشنا سنين بنصدقه ؟؟؟

** أحلم معايا و عيش الحلم و أوعي تفرط فيه و حققه

_ حلم !!!! ده الزمان عليا حرمه ....  و منامى بقي يجينى شخبطه

** لا تعاتب الأيام و عاتب ضميرك ... ساب الزمان يضحك عليك و يسرقك

_  يا عم سيبك ... بلا ضمير .... بلا أحلام ... بلا وقت علي الفاضي بنضيعه

** بكره الأيام تثبتلك أن الآمال الحلوه بتجيب فرح و سعاده و خير كتير

_ إزاى عايزنى اتكلم وحلمى آسراه السنين  والله ما يصير

** ذئب اليأس بيخدعك ... فك قيودك دى من ورق

_ نضمن منين.. نسمع كلامك نرتقي

** الضامن الله ... اسعي وتوكل عليه و احتسب

_ لا اله الا انت سبحانك إني كنت من الظالمين

** لسه الأمل موجود و نبع الحياة نابض ...  بدعاءك فكيت قيود و قيود

_هردده مرات و مرات و هقولي بأعلي صوت بكره أحلي بإذن الله

_______________________________________________________

تجميع الحروف الأولي

بكره أحلي بإذن الله

إهداء خاص لأسرة شركة تى واى دى

الجزمة اتسرقت

الجزمة اتسرقت 

ياااااااادى الكارثة الأزلية

دي مش أى جزمة

دى جزمة ذات طابع خاص

طابع يتسم بالجدية و الصرامه

جزمة تهتز لسرقتها مصر بأكملها

بل و يهتز العالم الخارجى حزنا علي فقدها

و يتفاخر لأول مره سارق نظرا لحصوله علي جزمة قيمة مثلها

إنها

إنها

إنها جزمة .................

.

.

.

لأ لأ لأ لأ لأ لأ لأ لأ لأ 

فهمتونى غلط

((بصوت واطى ... مش المشييييررررر)) 

إنها

.

.

.

.

إنها

.

.

.

.

إنها جزمة البنت اللي اتسرق منها الجزمة

((محدش يضرب ))

أنا مش بهزر ... أنا بعرض مشكلة انسانية

عملت أكونت ع الفيس بوك بتشتكى همها فيه

و نظرا للتعاطف مع مشكلتها قررت تبلغ عن فقد الجزمة

 و تسأل لعل و عسي حد لقاها و لا حاجه :D

و العجيب بقي انها لقيت اللي هيقبض علي الحرامى

شاب عسول ... و مش أى أى

ده أمين شرطة 

(( عشان متفتكرونيش بفشر عليكوا و لا حاجه .... استسمحتها تدينى صورة اثبات ))

عشان طبعا ارفقها

و مش كده و بس 

لأ 

و هددت الحرامى كمان

و تستمر البنت في البحث عن الجزمة

^_^ 

و الله الفيس بوك ده بيعمل حاجات كتيييييير

_________________________

تدوينة خفيفة موثقه بصور حقيقية 

يا رب تعجبكوا 

ليلة عانقت فيها القمر (قصة)

في ليلة من الليالي الصيفية ... انهيت كل أعمالي  باكرا علي غير عادتى.... وتذكرت كلام شخص قريب من قلبي (( يا بنتى السهر ده مش هينفعك ... النوم بالليل مفيد جداااااا)) فارتسمت علي وجهى ابتسامة رضا و كأنى اقول .. حاضر .. كل كلامك حاضر .. لأن كلامه ديما لمصلحتى ... فعمدت إلي سريري الوثير... ناظره بعينتاى إلي ما خارج الشرفه ... أتأمل نجوم السماء... و رأسي علي الوسادة التى أبوح لها دوما بكل أسراري .... و إلي جواري تلك الدمية ذات الرداء الوردى التى تشاركنى جل أحلامى ... و سمعت منى أمنياتى في يقظتى و منامى ... وجوالي كالعادة أوشكت بطاريته علي النفاذ ... و قد أوصلته بقابس الكهرباء ليتسنى لي استخدامه في الصباح .. و وضعته في مكانه المعتاد علي السرير لينام بهدوء قرب قدمي ... :)

ضممت دميتى الحبيبه و تنهدت تنهيده أقول فيها شكرا يا ربي علي نعمة راحة البال ... و بدأت أردد أذكار المساء إذ يقاطعنى صوت جوالي يعلن عن وصول رساله جديده بنغمته التى تكاد أحيانا تقتلنى من الضحك (( بصوت كاريوكي ... جاتلك رساله اقراها يا حبيبي))... ابتسم ابتسامه تنم عن سعاده لا اعلم هل مصدرها رنة موبايلي أم مصدرها وصول رسالة الان ... اضحك ضحكة صافيه بينى و بين نفسي علي تفكيري الدائم في ردود فعلي ... و انقلب في نومتي ... فتصبح رأسي محل قدمى علي السرير ... و قدماى تغازل وسادتى و كاتمة أسراري التى لا استطيع النوم بدونها ..امسك جوالي لاعرف من الذي تذكرنى و راسلنى ... فاجد أنها منه هو ... نعم ... هو ....

ذلك الانسان الحانى ... الذي أسر وجدانى ... و عانق شعوره أعماق قلبي وكيانى ... واقتحم بحنانه أسوار حصنى الحامي .. الذي تصدى لكل من طلب الاقتراب من عرش حبي و أماني .... و هو لا يعلم حقيقة شعوري الحانى تجاهه .. و رغم لهفتى علي فتح الرسالة .. حملت بقدمى وسادتى ... أفضل من أفضل لاعبة جمبارز محترفة ... و التقطتها بيداى ... ووضعتها تحت رأسي و استلقيت .. و بدأت افتح الرساله ... و استوقفنى و انا أكتب كلمة المرور للولوج الي الرسائل أشعة ضي القمر ... يا الله ... ما أروع بدر التمام ... لولا تلك الرساله و انقلاب وضعي ما رأيته ... اشكرك يا ربي و اشكرك عزيزي مرسل الرساله فأنت دائما مميز و رائع في نظري ... يزيد بهاء تميزك مواقف لا تعلم حتى بمدى رقي احساسي بها .. تخرج منك تلقائية ... استشعرها و اتأثر بها ... اترجمها بمنتهى الرومانسية ... و اتركها تداعب قلبي البرئ دون أن تدري أنت بكل ذلك... انتهيت من كتابة كلمة المرور فئذ أجد الرساله (( تصبحين علي خير يا فتاتى ... إلي اللقاء... لا اله الا الله  )) و كأنه يعلم بانى سأنام هذه الساعه اليوم في تلك اللحظه بالذات ..

اغمضت عينتاى ليسقط علي جفونى ضي القمر ... و تركت الجوال واحتضنت دميتى بحنان غامر ... و تنهدت تنهيده طويله .. أعلن بها أمام نفسي لأول مره .. انى فعلا أحبه ... و لا يهمنى كثيرا انه لا يشعر بذلك ... فشعوره بي كمجرد صديقة ... أمر لا يعنينى ... سأحبه بصمت و هدوء ... إلا إذا تحدث هو ... سأقف إلي جواره لا لأنه حبيبي ... و لكن لانه شخص يرضينى بخوفه عليّ و تقديره و احترامه لشخصي ... واختياره لأخري لن يؤذينى .. فنحن علي عهد صداقة بريئة و حب في الله ... وكونه فارس أحلامى ... لن يغير من الاوضاع شيء ...

ألتقطت جوالي مرة اخري ... و كتبت الرد (( وأنت من اهل الخير **** محمد رسول الله )) و تعمدت وجود تلك النجوم بهذا العدد بالتحديد ... فإنها المرة الاولي التى اصرح بينى و بين نفسي هذا التصريح .... 4 نجوم بدل 4 حروف ... أح .... أحبك يا صديقي بلا غرض ... أحبك محبة و صدقي فيها قد فُــرض ... أحبك و لا أخجل من شعوري ... فانت اهل للحب .. و الحب أهل لك :)


في تلك الليله .. بعد ان ارسلت رسالتى شعرت و انى في سعاده وكأنى عانقت القمر ..

رددت ذكري من جديد ... و صورته متخذة من هالة النور حول البدر بروازا لها و أنا أنظر اليها ... و اردد الأذكار و أقول ... الحب يجردنا أحيانا من الأنانيه ... اشكرك يا ربي وأدعوك أن لا تتركنى أعيش أسيرة حبي الصامت .. اللهم لا تعلق قلبي بما ليس لي ... خر لي الخير حيث كان  ...  و اعاود الأذكار بسعادة و رضا .. و ارد الدعاء .. و أردد ... و أردد ... و أردد ....

و قد كانت تلك الليله التى عانقت فيها القمر :)